Ағарту министрлігі мектеп формасына қатысты ережелерді түсіндірді.
Ағарту министрінің бірінші орынбасары Шынар Ақпарованың айтуынша, мектеп формасына қойылатын талаптар №26 бұйрықпен реттеледі. Мектеп ережелері оқушылардың ғимарат ішінде бас киім киюіне тыйым салуы мүмкін.
Ереже бұзушылық анықталған жағдайда, мектеп әкімшілігі, сынып жетекшісі және әлеуметтік педагог алдымен оқушымен және оның ата-анасымен түсіндіру жұмыстарын жүргізуі тиіс.
Егер ереже бұзушылықтар жалғаса берсе, бұзушылық сипаты мен қолданыстағы заңнамалық талаптарға сәйкес ата-аналар немесе заңды өкілдер жауапкершілікке тартылуы мүмкін.
Мектеп форманың үлгісін қамқоршылық кеңесімен, ата-аналар комитетімен және өзін-өзі басқару органдарымен ақылдаса отырып айқындайды. Дегенмен, мектептің ата-аналарды форманы белгілі бір өндірушіден немесе нақты бір дүкеннен сатып алуға мәжбүрлеуге құқығы жоқ.
Сонымен қатар, Ағарту министрлігі Қазақстандағы білім беру жүйесінің зайырлы сипатқа ие екенін атап өтті.